- डि. रावल
पत्रकार मित्रहरु,
प्रसंग यही २९ गते शिखर वार्तास्थल
वालुवाटारको हो । नेपाली जनताको शान्तिपूर्ण राजनीतिक निकासको
चाहाना र भावनामाथि कुठराघात हुन खोजीरहेको छ । माओवादी
लचकताको पराकाष्ठा पुग्दा समेत सात राजनीतिक दल विशेषगरि
नेपाली कांगे्रसको नेपाल र नेपाली जनताको उन्नती र प्रगतिको
वाधक बनेको राजतन्त्रप्रतिको मोहका कारण शान्तिवार्ता गम्भिर
मोडमा पुगेको छ । यतिसम्म कि अब फेरी वार्ता हुन पनि सक्छ
नहुन पनि सक्छ । यदि सरकारले जनताको भावना विपरित गएर
वार्तालाई भोजभतेर र चियापानमै सीमित राखेमा यो नै अन्तिम
वार्ता हुन्छ भन्ने लाग्छ । र, जनताले नयाँ आन्दोलनको घोषण
गर्दै आफ्नो पूर्ण मुक्ति गरिछाड्ने छन् ।
नेपालको ८० प्रतिशत भू-भागलाई सामन्ती
सत्तावाट मुक्तगरि २१ औं शताव्दीमा वैज्ञानिक राज्यसत्ताको
अभ्यास गरिरहेको माओवादी पार्टी वालुवाटारमा भोजभतेर
चियापानको लागि गएको होइन । जनताको शान्तिपूर्ण अग्रगामी
राजनीतिक निकासको भावनालाई सम्मान गर्दै राजनीतिक निकासको
लागि गएको हो । यतिखेर माओवादी नेतृत्व आत्म वलिदानकासाथ
जनताको चाहाना र भावना विपरित काम गर्ने, परिवर्तन
नचाहनेहरुका क्याम्पमा शान्तिपूर्ण राजनीतिक निकासको लागि
हामफालिरहेको छ । यो अरुले देखेजति सजिलो छैन । यो अवस्था
भनेको संक्रमणकालीन हो । परिवर्तन देख्न नचाहनेहरुले गम्भिर
षडयन्त्र गरिरहेका छन् र निहुँ खोजिरहेका छन् । मौका पाउने
वित्तिकै उनीहरुले माओवादी र सात दलबीच मुठभेडको स्थिति सृजना
गर्नेछन् र गम्भिर र अप्रिय घटना घटाउन पनि पछिपर्ने छैनन् ।
त्यतिवेला वालुवाटारको प्रशासन मुकदर्शक बन्ने निश्चित छ ।
यो विषयलाई लिएर माओवादी नेतृत्वलाई जनताले बडो चिन्ताकासाथ
सतर्क रहन सुझाव पनि दिइरहेका छन् ।
कुनैखालको घटना घट्न नदिन २९ गते
वालुवाटारमा माओवादीले आफ्ना स्वमसेवक परिचालन गरेको हो भन्ने
लाग्छ । यो पनि वार्ताटोली आउने समय अर्थात २ बजे अलि टाइट
थियो । त्यतिवेला मास कन्ट्रोलको क्रममा पत्रकार मित्रहरुलाई
अवरोध मात्र भएको हो । तर कारणबस वार्ताटोली ढिला आयो । यो
अवरोध त्यहाँ उपस्थित जनसमुदायलाई सामान्य लाग्यो तर पत्रकार
मित्रहरुले पहाड देख्नुभयो । साझसम्म आउँदा त आफ्नो
मर्यादालाई समेत भुल्दै अनेक कुरा गर्न थाल्नुभयो पत्रकार
मित्रहरु । मुखले र कलमले राजनीतिक ढंगबाटै गालि गर्न
थाल्नुभयो ।
मित्रहरु, हामीपनि वालुवाटारमै थियौं ।
यो अवरोधको पनि सम्बन्धित पक्षले माफि समेत मागिसकेको थियो ।
तरपनि तपाईहरुले आफ्नो उच्चतालाई भुल्नुभयो । तपाईहरुले त
ठिक गर्यौं सोच्नु भयोहोला नै तर तपाईहरुका पाठक र दर्शक भने
दंग परे । मित्रहरु, आफ्नो मर्यादा आफैले बचाउन सक्नुपर्छ ।
जनताले चाहने भनेको अनुशासित पत्रकारिता हो । पत्रकार भन्दैमा
जे गर्न र भन्न पाउनुपर्छ भन्ने मानसिकतावाट मुक्त हुनुपर्दछ
भन्ने लाग्छ । आफूले जतिखेर जे गर्न र भन्न पाउनु पर्छ भन्ने
माग गर्नु भनेको अराजक बन्न खोज्नु हो । अराजक पत्रकारितालाई
कसैले पनि सम्मान गर्दैन ।
हिजो गाउँमा जनता मार्न तम्सनेहरु अहिले
शहरमा आएर क्यामरा वोकेर पत्रकार पल्टेका हाम्रै आँखाले
देखेका छौं र जनआन्दोलनको वेला जनतालाई गोली ठोक भन्नेहरु पनि
पत्रकार बनेको देखियो ।
पत्रकारको कभरमा पत्रकार महासंघको सदस्यता
नं. ८३७ र काठमाण्डौं शाखाको सदस्यता नं. २८ लिएका राजाका
समर्थकलाई भूमिगत पार्टी खोल्न सल्लाहा दिने र माओवादी र
दलबीच भिडण्त गराउने योजनाकारका सहयोगी, दरवार यहीवेला कदम
नचाले गम्भिर संकट आउनु हो भन्दै दरवारीयाहरुलाई उत्तेजित
पार्न कतिथ पत्रकार प्रहरीका हवल्दार बबुर खरेल जस्ता दरवारका
एजेण्ट -बबुर खरेलको विस्तृत जानकारीको लागि जनादेश
साप्ताहिक वर्ष १५ अंक ४५, २०६३ असोज ३१ गते मंगलबार नेपाल
सम्बत् ११२६ हेर्नु होस्) पनि वालुवाटारमै थिए ।
मित्रहरु, ल तपाईहरु नै भन्नुस् विगतका
वार्ताका रिपोर्ट दरवारलाई दिएर वार्ताका विरुद्ध षडयन्त्रका
तानावाना बुन्न सहयोग गर्नेहरुवाट सतर्क रहने कि नरहने -
हरेक कुरा राजनीतिसंग जोडिएको हुन्छ । माओवादीले स्वम्सेवक
परिचालनको राजनीतिक महत्वलाई तपाईहरुले बुझन सक्नुभएन । केही
भएको होइन भन्ने पनि होइन केही अवरोध भएको भने अवश्य नै हो ।
यो सामान्य नै हो र सहजताकासाथ लिंदा राम्रो हुने थियो ।
यो गल्तिको माओवादी उपत्यका व्यूरोले
पत्रकार सम्मेलन गरि क. हिसिला यामीले पार्टी केन्द्रको
तर्फबाट माफी मागिसक्दा पनि फेरि टेलिभिजन र पत्रिकामा त्यही
पुराना कुरा देख्दा खिन्नता पैदा हुन थालेको छ । मित्रहरु,
वालुवाटारमा कुनै घटना घट्दा तपाईहरु कसैका पत्रिकाका पाठक
धेरै बन्छन् त कोही धेरै दर्शकको अगाडि देखा पर्नु हुन्छ तर
त्यसको जवाफदेही कोही हुनुहुदैन । जो जवाफदेही हुन्छ उसले
त्यहाँको वातावरण आफ्नो नियन्त्रणमा लिनु स्वभाविक हुन्छ ।
यही क्रममा हुने कमजोरीलाई पहाड बनाएर हेर्नु हुँदैन ।
पत्रकारले बातावरणलाई सहज बनाउन खोजेका हुन कि तनावग्रस्त -
जनताले प्रश्न गर्न थालेका छन् । जनताको यो प्रश्नको उत्तर
तपाईहरु नै दिनुहोला ।
हाल काठमाण्डौ
